पाल्पा,निस्दी गाउँपालिका-५ गल्धाकी ४९ वर्षीया यमीसरा सारूले यस वर्ष दुई सय धार्नी अदुवा बिक्री गर्नुभयो । सारूले बारीमा अदुवा मात्रै हैन गेडागुडी पनि लगाउनुभएको छ। अदुवा, गेडागुडी बिक्रीबाट उहाँ मासिक तीस हजार बढीको आम्दानी गर्न सफल भएको बताउँनुहुन्छ ।
गाउँमा रहेको गल्धा सामाजिक उद्यमी महिला सहकारी संस्था लिमिटेडमा लगेर यमीसरा सारूले आफ्नो उत्पादनलाई बिक्री गर्नुहुन्छ । आफ्नो उत्पादन बिक्री गर्ने मात्र नभएर यमीसराले गाउँको सहकारीमा अदुवाको ग्रेडिङ तथा अन्य ग्रेडिङकाे काम दैनिक ज्यालादारीमा गर्नुहुन्छ । सहकारीले यहाँकाे अदुवालाई बजारीकरण गर्दै विदेश पठाएपछि अदुवा लगाउने किसानहरु खुशी हुनुहुन्छ । कुराकानीकाे सन्दर्भमा यमीसरा सारू भन्नुहुन्छ, “हामीले लगाएकाे अदुवाले राम्रै आम्दानी लिने गरेका छौं ।” सहकारीले किसानले गाउँमा उत्पादन गरेका अदुवा सिमी दाना लगायत गेडागुडीकाे ग्रेडिङ तथा प्याकेजिङ गरी देश बिदेशमा पठाउँदै आएको छ । यसले एकातिर सहकारीको काम र क्षेत्रमा समेत फराकिलो गराएको छ,भने अर्कोतर्फ यहाँकन किसानको उत्पादनले सहज रुपमा बजार पाएको छ उहाँ भन्नुहुन्छ ।
त्यस्तै स्थानीय ४२ वर्षीया गनिसरा बयम्बु पनि सहरकारीको शेयर सदस्य रहनुभएको छ । उहाँले पनि अदुवाकाे उत्पादन गरी बिक्री गर्नुका साथै सहकारीकाे दैनिक ज्यालादारीमा काम गर्दै आउनुभएको छ । उहाँले भन्नुहुन्छ,सहकारीकाे स्थापना भएपनि यस क्षेत्रमा कृषिकाे उद्यमशीलता निकै फराकिलो बन्दै गएको र जीवनशैली तथा दैनिकी समेत फेरिएको छ उहाँ बताउँनुहुन्छ ।यो सहकारीले बिगत दुई वर्षदेखि सुकाइएका अदुवाका चाना बिदेश निर्यात गर्दै आएको छ । काँचो अदुवा ९ हजार ८ सय केजी युरोप निकासी भएको सहकारी संस्थाका ब्यवस्थापक डिलमाया सारुले बताउँनुहुन्छ । अहिले सहरकारी संस्थाको गाडीले निस्दीका किसानहरूको घरघरमा पुगेर उत्पादित अदुवा ल्याउने र सहकारीमा ल्याएपछि त्यस अदुवाको चाना बनाउने, ग्रेटिङ गर्ने कार्य गरिरहेकाले चाना र ग्रेडिङ पछि ड्राइ गरि विदेश पठाउने समेत उहाँले बताउँनुभयो ।
सहकारीमा हाल दैनिक पन्ध्र जना महिलाहरुले अदुवा सफा गर्न, चाना बनाउने, सुकाउने काम गर्दै आएका छन् व्यवस्थापक सारूले बताउँनुभयाे । सहकारीमा त्यस्तै पच्चीस हजार केजी सेतो सिमीकाे ग्रेडिङ काम सकिएको र त्यसलाई विदेश पठाउने तयारी भइरहेको उहाँले बताउँनुभयो ।सहकारीमा आवद्ध रहनुभएका दुई सय बहत्तर जना किसानसँग अर्गानिक प्रमाणित गरेर अदुवा खरिद गरी विदेश निकासी गर्ने तयारी गरिएको सहकारी व्यवस्थापक सारूले भन्नुभयो । यसका लागि सहकारीले हेफर नेपालबाट आर्थिक र प्राविधिक सहयोग प्राप्त गरेको छ, ग्रामीणआर्थिक विकास संघ ( रेडा-पाल्पा) तथा अकिस्टा नेपालको समन्वय सहयोग एवं निस्दी गाउँपालिकाको सहकार्यमा अभियान चलाएको ब्यवस्थापक सारुले बताउँनुभयो ।
यस वर्ष युरोपबाट आएको माग पूरा गर्न पच्चीस हजार एकासी केजी सेतो र तीन हजार उनान्साठी केजी कालो तथा खैरो गरी अट्ठाइस हजार एक सय चालिस केजी सिमी सहकारीले खरिद गरेको व्यवस्थापक सारुले बताउँनुभयो । त्यसका लागि कृषि प्राविधिक अकिस्टा नेपाल प्रालिले नै खटाएको समेत सहकारी व्यवस्थापक बताउँनुभयो ।स्थानीय रोजी सुनारीले अदुवा उत्पादन गर्ने किसानहरुका लागि यो सहकारी बरदान सावित भएको बताउँदै उहाँले बाँदर दुम्सीले पनि नखाने र राम्रो उत्पादन गर्न सकिने र बेच्न पनि सजिलो हुने भएकोले किसानहरु यस तर्फ आकर्षित भएको बताउँनुभयो ।सहरकारीले अदुवाको चाना तीन वर्ष अघिबाट युरोप निकासी सुरु गरेको हो । यसवर्ष पनि अकिस्टा नेपालले नसे जातको अदुवाको दस हजार केजी चाना निर्यात गर्ने सम्झौता गरेको छ । यो काँचो अदुवा साठी देखि पैसट्ठी हजार केजी हो ।
सहकारी संस्थाले २०८१ साल जेठमा चार हजार चार सय साट्ठी केजी अदुवाको चाना युरोपकाे बजारमा पठाएको थियो । संस्थाले दुई वर्षअघि अर्गानिक प्रमाणित गरेर आठ सय पाँच किलो अदुवा नमुना परीक्षणका लागि युरोप पठाएको थियो । निकासी गर्ने संस्थाले प्रशोधन घाटा,प्रमाणीकरण,ओभरहेड लगायतमा समेत सहकारी संस्थालाई सहयोग गर्ने गरेको छ ।यस सहकारीले अदुवाको खरिद गरि प्रशोधन तथा ब्रान्डिङ गरेर बजारीकरण गर्ने, गेडागुडीको खरिद तथा बजारीकरण र लेभल गरि बजारीकरण गर्ने र खशी बोकाहरूको बजारीकरण एवं पशु बस्तुको इन्स्योरेन्स लगायतका कार्य गर्दै आएको समेत सहकारी व्यवस्थापक सारूले बताउँनुभयाे । उहाँले कुराकानी सन्दर्भमा जाेड्दै भन्नुभयो २०७३ सालमा स्थापना भएको यो सहकारीको अभियानले निस्दी गाउँपालिकालाई देश बिदेशमा पहिचान दिन सफल भएको र स्थापनादेखि हालसम्म निस्दी गाउँपालिकाले उल्लेख्य सहयोग गर्दै आएको बताउँनुभयाे ।हाम्रो काममा प्रेरित गर्न हामीलाई गाउँपालिकाले सहकारी भवन निर्माण गरिदिने एवं गाडीकाे खरिद तालिम लगायत कार्यहरुमा प्रत्यक्ष सहयोग रहँदै आएको सारूले बताउँनुभयाे । त्यस्तै निस्दी गाउँपालिकाका अध्यक्ष मुक्तबहादुर सारुले आगामी दिनमा पनि गाउँपलिकाको तर्फबाट यो सहकारीकाे आवश्यकता अनुसारको सहयोग निरन्तर रहने बताउँनुभयो ।
