पाल्पा, तानसेन नगरपालिकाद्वारा गठित तानसेन नगर प्रज्ञा प्रतिष्ठानको आयोजनामा विभिन्न क्षेत्रमा याेगदान पुर्याउने स्रष्टा एवं प्राज्ञिक व्यक्तित्व र सामाजिक कर्ममा विशिष्ट याेगदान गर्ने व्यक्तित्वहरूलाई सम्मान गरिएको छ । तानसेनकाे भाषा,कला, साहित्य, शिक्षा, स्वास्थ्य, संस्कृति, सम्पदा, परम्परा, कृषि, उद्योग, पर्यटन, रीतिरिवाज, जात्रा, मेलापर्व, समाजसेवा क्षेत्रमा योगदान दिनुहुने पैंतीस जना विशिष्ट व्यक्तित्वहरूलाई सम्मान गरेकाे हाे ।तानसेन नगर प्रज्ञाप्रतिष्ठानद्वारा आयोजित सम्मान कार्यक्रममा तानसेन नगरपालिका नगर प्रमुख एवं प्रज्ञाप्रतिष्ठानका कुलपति सन्तोषलाल श्रेष्ठको प्रमुख आतिथ्यतामा सम्पन्न सम्पन्न भएको हाे ।
प्रज्ञाप्रतिष्ठानकाे सम्मान तथा पुरस्कार अर्पण कार्यक्रमकाे उद्घाटन गर्नुहुँदै नगर प्रमुख श्रेष्ठले तानसेनकाे भाषा,साहित्य, कला, संस्कृति, सम्पदा, परम्परा, कृषि, उद्योग, पर्यटन, शिक्षा, स्वास्थ्य, रीतिरिवाज, जात्रा, मेलापर्व, समाजसेवा लगायतका क्षेत्रकाे प्रचार एवम प्रवर्द्वन गर्नका लागि १५औँ नगर सभाबाट पारित नीति तथा कार्यक्रम अनुसार तानसेन नगर प्रज्ञाप्रतिष्ठान गठन गरिएको बताउँनुभयाे । १७ सदस्यहरू रहेकाे प्रतिष्ठानमा नगरपालिकाले आर्थिक बर्ष २०८०/८१ मा १५ लाख रूपैयाँ बजेट विनियोजन गरेको बताउँनुभयो । उहाँले गठन गरिएको नगर प्रज्ञाप्रतिष्ठानले नगरको बौद्धिक धरातललाई मजबुत बनाउन एवं प्राज्ञिक क्षेत्रबाट नगरको विकासमा समेत सहयोग पुर्याउने विश्वास नगरपालिकाले लिएकाे बताउँनुभयो । प्रतिष्ठान मार्फत साहित्य, कला तथा सांस्कृतिक क्षेत्रमा संलग्न व्यक्तित्वहरूलाई निरन्तर प्रोत्साहित गरिने समेत नगर प्रमुख श्रेष्ठले बताउँनुभयो ।
कार्यक्रमका विशिष्ट अतिथि प्रमुख जिल्ला अधिकारी तोया नारायण सुवेदीले तानसेन नगर प्रज्ञा प्रतिष्ठानले तानसेनकाे भाषा, कला, संस्कृति संरक्षण र प्रवर्द्वन गर्नलाई टेवा पुर्याउने बताउँनुभयो । प्रज्ञा प्रतिष्ठानले समाज याेगदान पुर्याउनुभएका व्यक्तित्वहरूलाई कदर गरी प्रशंसनीय कार्य गरेको बताउँनुभयो । त्यस्तै प्रतिष्ठानले भाषा, कला, साहित्यकाे क्षेत्रमा काम गरेका व्यक्तित्वलाई सम्मानित गराउने संस्कार र संस्कृतिकाे विकास गरेको बताउँनुभयाे । नगर प्रज्ञाप्रतिष्ठानले तानसेनलाई भाषा कला साहित्यको माध्यमबाट आगामी दिनमा नगरकाे विकास टेवा पुर्याउने विश्वास व्यक्त गर्नुभयाे ।
कार्यक्रममा नेपाल पत्रकार महासंघ पाल्पाका सचिव रामचन्द्र रायमाझीले तानसेन नगर प्रज्ञा प्रतिष्ठानले समाजका सम्मानित व्यक्तित्वहरूकाे योगदानको कदर गरि सम्मान गर्नु प्रशंसनीय कार्य रहेको बताउँदै उहाँले जिल्लाका अन्य संघ–संस्थाहरूसँग पनि नगर प्रज्ञाप्रतिष्ठानले सहकार्य गरेर काम गर्न समेत आग्रह गर्नुभयाे । कार्यक्रममा तानसेन नगरपालिका उप–प्रमुख प्रतिक्षा गाहा सिङ्जाली, नगरपालिकाका प्रमुख प्रशासकीय अधिकृत पिताम्बर पाण्डेय, वडा अध्यक्षहरू, कार्यपालिका सदस्य, नगरका कर्मचारीहरू तथा पत्रकारहरूको उपस्थिति रहेको थियो ।
नगर प्रज्ञाप्रतिष्ठानले सम्मानित व्यक्तित्वहरूलाई नगद,टीका,माला, ढाकाकाे दाेसल्ला ओढाएर मेडल र प्रमाणपत्र प्रदान गरिएको थियो । कार्यक्रमकाे अवसरमा बृद्धसेवा पुरस्कार स्वरूप ६८ हजार रुपैयाँ राशीकाे पुरस्कार पाल्पाली ढाका उद्योगी पुर्ण माया महर्जनलाई प्रदान गरिने नगरपालिकाले जनाएको छ । तानसेन नगर प्रज्ञा प्रतिष्ठानका सदस्य अर्चना शाक्यले अतिथिहरूलाई स्वागत गर्दै प्रज्ञाप्रतिष्ठानले तानसेनको भाषा, कला र संस्कृतिमा योगदान दिने व्यक्तित्वहरूको पहिचानलाई अझ उच्च बनाउने प्रतिबद्धता व्यक्त गर्नुभयाे ।
कार्यक्रम तानसेन नगर प्रज्ञाप्रतिष्ठानका उप-कुलपति चोलेश्वर शर्माको अध्यक्षता, नगरपालिका याेजना शाखा प्रमुख एवं नगर प्रज्ञाप्रतिष्ठानका सदस्य सचिव दुर्गा थापा र तानसेन नगर प्रज्ञा प्रतिष्ठानका सदस्य शंकर गैरे द्वयकाे सञ्चालनमा सम्पन्न भएको थियाे ।कार्यक्रमको अवसरमा भाषा, साहित्य, कला, संस्कृति, सम्पदा, परम्परा, कृषि, उद्योग, पर्यटन, शिक्षा, स्वास्थ्य, रीतिरिवाज, जात्रा, मेलापर्व, समाजसेवा लगायतका क्षेत्रमा योगदान दिने ३५ जना व्यक्तित्वहरूमा साहित्यकार अजम्बरध्वज खाती, कलाकार तथा चित्रकार एवं साहित्यकार अशोकमान सिं, कृष उद्यमी केशव कार्की, ढाका उद्योगी हरिकृष्ण कार्की र गंगाराम नेपाल, शिक्षा, स्वास्थ्य तथा समाजसेवी गोपाल बहादुर पोखरेल, शिक्षा तथा समाजसेवी झमानसिं दर्लामी,शिक्षा तथा पर्यटन उद्यमी टुकबहादुर अर्घाली थापालाई नगद,सम्मान-पत्र,पाल्पाली ढाकाले सम्मान गरिएको थियोे ।
त्यस्तै सम्मान कार्यक्रममा शिक्षाविद् तथा समाजसेवी देवप्रसाद बज्राचार्य, द्धारिकाप्रसाद शर्मा, बुद्धीप्रसाद शर्मा, राधाकृष्ण शर्मा, प्रा.डा.सावित्री कक्षपति, सुशीला श्रेष्ठलाई सम्मान तथा पुरस्कार सहितको प्रमाण-पत्रले सम्मान गरिएको छ । त्यस्तै साहित्यकार वनमाली निराकार, विजय सागर, राजेन्द्र गोपाल सिंह, डा. नारायणप्रसाद शर्मा गैरे, मन गहिरे, रजिउल्लाह खाँ स्वास्थ्यसेवी विश्वमान बज्राचार्य, डा.रचेल कारख, लोकमान शाक्य, पर्यटन उद्यमी सावित्रा भुसाल, धनिश्वर बस्याललाई सम्मान तथा पुरस्कार प्रदान गरिएको हाे।
अभिनेता तथा चलचित्रकर्मी नायक धीरेन शाक्य,संगीतकर्मी तथा संस्कृतिविद् महेश देउराली, मदन देउराली, भरत देउराली पत्रकार मेघराज शर्मा, गायक कलाकर्मी मीना नेपाली (गैरे), धातुकला उद्यमी मंगलप्रसाद बज्राचार्य, प्रदीपकुमार बज्राचार्यलाई नगर प्रमुख एवं नगर प्रज्ञा प्रतिष्ठान कुलपति सन्तोषलाल श्रेष्ठ र उपप्रमुख प्रतिक्षा गाहा सिंजाली, नगर प्रज्ञा प्रतिष्ठान उपकुलपति चोलेश्वर शर्माले नगद १० हजार, सम्मानपत्र, तक्मा, पाल्पाली ढाकाको दोसल्ला ओढाएर सम्मान गर्नुभएको छ । तानसेन नगरपालिका उपप्रमुख प्रतीक्षाका गाहा सिङजालीको धन्यवाद ज्ञापन सहित सम्मान कार्यक्रम सम्पन्न भएको हो ।
