पाल्पा, शुक्रबार देखि सुरु हुने दोस्रो तानसेन महोत्सवको तयारी पूरा भएसंगै पाल्पा व्यापार संघ पाल्पाले पत्रकार सम्मेलन गर्दै जानकारी गराएको छ । पाल्पा व्यापार संघले तानसेनमा पत्रकार सम्मेलनकाे आयोजना गर्दै तानसेनको खस्कदो उद्योग, व्यापार र आर्थिक गतिविधिलाई चलायमान बनाउने उद्धेश्य राख्दै स्थानीय सरकार र उद्योग तथा व्यवसायीसंगको सहकार्यमा मेला आयोजना गरिएको दाेस्राे तानसेन महोत्सव मेला आयोजक समितिले तयारी सकिएपछि जानकारी गराएको हो ।
तानसेनकाे कृषि, पर्यटन, उद्योग, व्यापार, रोजगारी सिर्जना गर्ने र समग्र जिल्लाकाे विकास एवं व्यापार विस्तारमा महत्वपूर्ण टेवा पुर्याउने लक्ष्य सहित महोत्सव आयोजना गर्न लागिएको संघका अध्यक्ष विष्णुबहादुर कार्कीले बताउँनुभयो। उहाँले महोत्सव चैत्र २२ गतेदेखि २०८२ वैशाख ३ गतेसम्म तानसेनकाे टुँडिखेलमा सञ्चालन हुने जानकारी गराउँनुभयाे ।व्यापार संघका अध्यक्ष कार्कीले तानसेनमा पत्रकारहरूसंगकाे तयारी सम्वन्धि जानकारी दिन गरिएको पत्रकार सम्मेलनमा मेला सम्पन्न गर्न यहाँहरूकाे साथ सहयोगकाे अपेक्षा गरेको समेत कार्कीले बताउँनुभयाे । नेपाल महासंघ पाल्पाका अध्यक्ष कमलराज तिमिल्सेनाले जिल्लाको आर्थिक विकास र राेजगारी दिनलाई मेला महोत्सवले महत्वपूर्ण भूमिका निर्वाह गर्ने भएको बताउँदै उहाँले पाल्पाली पत्रकारहरुले सदैव पाल्पा जिल्लाको विकासमा ऐक्यबद्धता जनाउँदै सधै साथ सहयोग गर्दै आएकोले पनि गुण र दोषका आधारमा सहयोग गर्ने कुरा प्रतिबद्धता व्यक्त गर्नुभयो । यसपटकको महोत्सवको आर्कषकको रुपमा फिस टनेल, औद्योगिक वस्तु तथा सेवाहरुको प्रर्दशनी, लद्यु उद्यमी तथा व्यवसायीहरुलाई प्रोत्साहन गर्ने कार्यक्रम, कृषि उद्योग र स्थानीयस्तरमा उत्पादन भएको बस्तुकाे बजारीकरण र प्रर्वद्वन हुने छ ।
स्थानीय भाषा, कला संस्कृति,धार्मिक मूल्य मान्यताहरुको संरक्षण तथा स्थानीय प्रविधि सहित उत्पादनलाई प्रोत्साहन गर्ने किसिमको क्रियाकलापहरु हुनेमा पाल्पा व्यापार संघका अध्यक्ष कार्कीले पत्रकार सम्मेलनमा बताउँनुभयाे । महोत्सवमा विशेष प्रर्दशनी अन्तर्गत कृषि तथा पशुपंक्षी प्रतियोगितात्ममक कार्यक्रम स्थानीय उत्पादनको प्रर्दशनी विभिन्न टोल विकास संस्था, विद्यालय, विभिन्न संघ-संस्थाहरू लगायतका झाँकी र्यालीकाे प्रर्दशन गरिने संघका महासचिव तुलबहादुर अधिकारीले बताउँनुभयो । उक्त झाँकी र्यालीमा उत्कृष्ट हुनेलाई पुरस्कार स्वरुप (प्रथम हुनेलाई पचास हजार, दोस्रो हुनेलाई तीस हजार, तेस्रो हुनेलाई बीस हजार र सान्त्वना हुनेलाई पाँच हजार) सम्पूर्ण सहभागी समूहलाई सहभागिताको प्रमाण-पत्र प्रदान गरिने बताउँनुभयो । दाेस्राे तानसेन महोत्सवमा तानसेन डान्स आइडल २०८१/०८२ को आयोजना गरिएको छ । जसमा पहिलो हुनेले पैँतालीस हजार पाँच सय पच्पन्न,दोस्रो हुनेले तीस हजार पाँच सय पच्पन्न र तेस्रो हुनेले बीस हजार पाँच सय पच्पन्न रूपैयाँ प्राप्त गर्ने छन् ।
यस्तै विद्यालय स्तरीय नृत्य प्रतियोतिता पनि रहनेछ उक्त प्रतियोगितामा प्रथम हुनेले नगद पन्ध्र हजार पाँच सय पच्पन्न , दोस्रो हुनेले दस हजार पाँच सय पच्पन्न र तेस्रो हुनेले पाँच हजार पाँच सय पच्पन्न रुपैयाँसहित प्रमाण-पत्र तथा पुरस्कार प्राप्त गर्ने संघका कार्यसमिति सदस्य गोकुल पौडेलले बताउँनुभयो । महोत्सवमा राष्ट्रिय तथा स्थानीय कलाकारहरुको दैनिक प्रस्तुति रहनेछ । जसमा स्थानीय कलाकारहरुलाई प्राथमिकता दिइने छ । कृषि, उत्पादन, लघु उद्यम तथा घरेलु प्रर्दशनी, शैक्षिक सामाग्री प्रर्दशनी, बैङ्क तथा वित्तीय संस्था, सूचना प्रविधी, अटोमोवाईल, स्वास्थ, पर्यटन तथा अन्य स्वदेशी उत्पादन, बालउद्यान, होटल र रेष्टुरेन्ट गरि तीन बढी स्टलहरू रहेका छन् ।
तानसेन महोत्सवको समयमा करिब पाँच लाख बढी दर्शकले मेलाको अवलोकन गर्ने र यस अवधीमा करिब आठ करोड भन्दा माथीको कारोबार हुने अनुमान गरेको मेला आयोजक संस्थाले जनाएको छ ।महोत्सव प्रवेशका लागि साधारण टिकटको मूल्य ७५ रुपैयाँ र विद्यार्थी सहुलियत टिकटको मूल्य ५० रुपैयाँ रहेको छ । ज्येष्ठ नागरिक र अपाङ्गता भएका व्यक्तिहरुका लागि प्रवेश निशुल्क गरिएको छ । महोत्सवको व्यवस्थापनको पक्ष एभरेष्ट इभेन्ट म्यानेजमेन्ट प्रालि चितवनले हेरेको छ, भने महोत्सवको मुख्य आयोजक तानसेन नगरपालिका रहेको संघका प्रेस संयोजक दयाराज न्यौपानेले पत्रकार सम्मेलनमा जानकारी दिनुभयो ।
