प्रदेश संवाददाता रूपन्देही, शहरी योजना, पूर्वाधार विकास तथा विपद् व्यवस्थापन क्षेत्रमा उल्लेख्य कार्यसम्पादन गरेको बताउँदै रुपन्देहीको भैरहवास्थित सिद्धार्थनगर नगरपालिका देशभरका नगरपालिकाहरू मध्येबाट उत्कृष्ट भएको जनाएको छ । नेपाल नगरपालिका सङ्घले आर्थिक वर्ष २०८०/८१ मा उत्कृष्ट कार्यसम्पादन गरेको भन्दै सिद्धार्थनगरलाई पुरस्कृत गरेको हो ।
सङ्घको ३२औँ स्थापना दिवसकाे अवसरमा आयोजित विशेष समारोहमा नेपाल सरकारका सम्माननीय प्रधानमन्त्री केपी शर्मा ओलीले सिद्धार्थनगर प्रमुख इश्तियाक अहमद खाँ र उपप्रमुख उमा अधिकारीलाई उत्कृष्ट नगरपालिका पुरस्कार,२०८१ बाट काठमाडौंमा सम्मान गर्नुभएकाे हाे । नगरपालिका सङ्घले उक्त विधामा प्रत्येक वर्ष कार्यसम्पादनमा उत्कृष्ट देशभरका नगरपालिकाहरूमध्ये उत्कृष्टलाई पुरस्कृत गर्दै आएको छ ।
आव २०८०/८१ मा सङ्घले प्रदान गर्ने पुरस्कार प्राप्त गर्न पाउँदा खुसी लागेको सिद्धार्थनगरका प्रमुख खाँले बताउँनुभयाे ।सङ्घले नगरपालिकाहरूको विभिन्न सूचक हेरेर पुरस्कार प्रदान गर्ने गरेको बताउँदै नगर प्रमुख खाँले त्यहीँ सुचकका आधारमा सिद्धार्थनगर नगरपालिकालाई उत्कृष्ट घोषणा गरिएको हो । सिद्धार्थनगर नगर प्रमुख खाँले सबैको मेहनत एवं योगदानले नगरपालिका उत्कृष्ट भएको बताउँनुहुदै नगरवासीलाई धन्यवाद दिनुभयाे । ‘हामी जनप्रतिनिधि,कर्मचारी,सिद्धार्थनगर नगरवासीको साथ र योगदानले उत्कृष्ट नगरपालिकाको पुरस्कार प्राप्त गर्न सफल भयौँ’, उहाँले भन्नुभयाे, ‘यो सम्मानले हामीलाई अझै कामप्रति थप जवाफदेही बनाएको छ ।’ हामी जिम्मेवारीलाई पूर्णढंगले उपयोग गर्दै आगामी दिनमा सबै सूचकाङ्कमा पालिकालाई सर्वोकृष्ट हुनेगरी काम गर्नुपर्ने समेत उहाँले बताउँनुभयाे ।
सिद्धार्थनगरले मुलुकभरका नगरपालिकालाई पछि पार्दै ८५ प्रतिशत अङ्क प्राप्त गरेको नगरपालिका सङ्घले जनाएको छ । शहरी योजना,यातायात व्यवस्थापन तथा खानेपानीमा पनि नगरपालिकाले उत्कृष्ट कार्यसम्पादन गरेको जनाइएको हाे ।
