पाल्पा, राष्ट्रिय गौरवको आयोजनाका रूपमा रहेको सिद्धबाबा सुरुङमार्गको भौतिक प्रगति ५४ प्रतिशत पुगेको छ भने वित्तीय प्रगति ४८ प्रतिशत रहेको छ । सुरुङमार्गको ‘ब्रेक थ्रू’ भएपछि कामले गति लिएको हो । अहिले ‘इन्भर्ट र लाइनिङ’ को काम धमाधम अघि बढिरहेको आयोजना इन्जिनियर सविता ज्ञवालीले बताउँनुहुन्छ । उहाँका अनुसार मुख्य टनेलको कुल एक हजार ८९ मिटरमध्ये इन्भर्टको ९९० मिटर काम सकिएको छ भने लाइनिङको एक हजार १२६ मध्ये ६६० मिटर काम सकिएको सिद्धबाबा सुरूङ्मार्गआयाेजना इन्जिनियर ज्ञवालीले बताउँनुभयाे । बाइपास–१ मा ‘इन्भर्ट र लाइनिङ’ को काम भइरहेको जनाउँदै बाइपास–३ मा ‘इन्भर्ट’ को काम सुरु भएको समेत बताउँनुभयाे। बाइपास–१ मा १५१ मिटर रहेकामा १४५ मिटर र लाइनिङको ११८ मिटर काम भइसकेको उनले उल्लेख गर्नुभयाे ।
“बाइपास–२ मा १६१ मिटर छ । यहाँ अहिलेसम्म इन्भर्ट र लाइनिङको काम सुरु भएको छैन । बाइपास–३ मा १३० मिटर छ । जसमा इन्भर्टको ३६ मिटर काम भइसकेको छ । लाइनिङको काम भने सुरु भएको छैन”,आयोजना इन्जिनियर ज्ञवालीले भन्नुभयाे ।यहाँ यथाशीघ्र भित्तामा कङ्क्रेटिङ गर्ने, सडक निर्माण, सुरुङभित्रकाे ढलान, भेन्टिलेसन, लाइनिङ, विद्युत् जडान, अक्सिजन वारपार, सुरक्षाका उपाय, आगो निभाउने यन्त्र जडान लगायत काम गरिने जानकारी दिनुभयाे। उहाँले त्यसपछि सुरुङ मार्गको उत्तर र दक्षिणपट्टि हेलिप्याड निर्माण गरिने भन्नुभयाे । सिद्धार्थ राजमार्गअन्तर्गत बुटवल–तानसेन खण्डको माथिल्लो सिद्धबाबा मन्दिरबाट एक हजार १२६ मिटर सुरुङमार्ग विसं २०७९ देखि निर्माण सुरु भएको हो । यो आयोजनाअन्तर्गत मुख्य सुरुङको ‘ब्रेक थ्रू’ भइसकेको छ ।
वि.सं २०८३ मा सम्पन्न गर्ने गरी चाइना स्टेट कन्स्ट्रक्सन इन्जिनियरिङ कर्पोरेसनले सात अर्ब ३४ करोड २१ लाख ४० हजार रुपैयाँमा ठेक्का सम्झौता गरेको थियो । सिद्धार्थ राजमार्गको तल्लो सिद्धबाबा मन्दिरबाट पाल्पाको दोभानसम्म पहिरोको जोखिमयुक्त क्षेत्र मानिन्छ । सुक्खा याममा पनि धुले पहिरो खस्ने गरेकाले राजमार्गको यस खण्डलाई सुरक्षित बनाउन सुरुङमार्ग निर्माण गरिएको इन्जिनियर ज्ञवालीले बताउँनुभयाे । यसअघि पहिरोकाे कारण क्षति ब्यहोर्नुका साथै त्रासदीमा यात्रा गर्नुपर्ने बाध्यतामा रहेकाे बताउँदै सुरुङ मार्गको ‘ब्रेक थ्रू’ भएपछि खुसी भएका छन् । यो खण्ड प्रयोग गरी गुल्मी, पाल्पा, अर्घाखाँची, स्याङ्जा, पोखरा, बाग्लुङ तथा म्याग्दीसम्म सवारीसाधन आवतजावत गर्दछन् । यहाँ हरेक वर्ष जाने पहिरो कारणले जनधनको क्षति हुने गरेपछि सुरुङमार्ग निर्माण थालिएको हो ।
छिचोलिएको सुरुङमार्गमा अब एक वर्षपछि नियमित रूपमा सवारी आवागमन हुने समेत आयोजनाले जनाएको छ । बजेट सुनिश्चित भएपछि काम तीव्र गतिमा भइरहेको समेत आयोजना इन्जिनियर ज्ञवालीले उल्लेख गर्नुभयाे । उहाँले सरकारले आगामी आर्थिक वर्ष २०८२ र ८३ को बजेटमा यस खण्डका लागि रकम विनियोजना गरेपछि समयमा काम सम्पन्न हुने उहाँले विश्वास व्यक्त गर्नुभयाे ।सरकारले पाल्पा–सिद्धबाबा खण्डमा निर्माणाधीन सुरुङमार्ग र नागढुङ्गा सुरुङमार्गका लागि यसवर्ष दुई अर्ब ६० करोड रुपैयाँ बजेट विनियोजन गरेको छ । बजेट विनियोजन भएपछि काम समयमा सम्पन्न हुनेमा आफूहरू विश्वस्त रहेको स्थानीय गोविन्द्र पोखरेल बताउँनुहुन्छ । उहाँले भन्नुयाे, “आर्थिक मन्दीका कारण बजेट कटौती गरेर सुरुङमार्गको काम समयमा नसकिने हो भन्ने चिन्ता लागेको थियो । तर सरकारले बजेटमा प्राथमिकता दिएर रकम विनियोजन गरेपछि हामी ढुक्क छौँ ।”
अर्का स्थानीयवासी गम्भीर रायमाझीले कतिपय निर्माणाधीन आयोजनाहरू बजेट अभावमा अलपत्र परेका उदाहरणहरू रहेकाे भन्दै सरकारले यस खण्डलाई प्राथमिकतामा राख्नु हाम्रा लागि खुसीको विषय भएको बताउँनुभयाे। बजेट विनियोजनले सुरुङमार्गको काम निर्धारित समयमा नै सकिने भन्दै उहाँले सुरुङमार्ग सम्पन्न भएपश्चात् आवागमन सहज हुने धारणा राख्नुभयाे ।
